د قيامت ورځ

حضرت ملاکی علیه السلام د قیامت د ورځې په حقله خبرې وکړې. دا هغه ورځ ده چې خدای به نیک خلک له بدو خلکو نه بيل کړى. بد به تباه شى خو نېکان به برکت ومومى.

د خدای پاک رسول، پولوس مونږ ته خبردارے راکړو چې خدای به مونږ هر یو له زمونږ د عملونو په مطابق اجر راکړى. هغه کسان چې خود غرضه دى او هغه څه رد کوى چې سم دى، د خدای پاک غضب او قهر ته به مخامخ شى.

دا د هغې لویې او وېروونکې ورځې تشریح ده. خدای پاک به په یو لوی سپین تخت راښکاره شى. ټول مړه، لوی او واړۀ به د خدای په وړاندې ودریږي او کتابونه به پرانستل شى. د خلکو عدالت به د هغوئ د عملونو په مطابق وشى. بیا به وروستے کتاب، چې د ژوندون کتاب دے، پرانستلے شى. د عدالت نه پس به، مرګ او هغه کسان چې بد کارونه يې کړى دى د اور په درياب کې به وغورځولے شى - دا دوهم مرګ دے. هغه کسان چې نومونه یې د ژوندون په کتاب کې لیکلے شوى دى د خدای پاک سره به ابدى ژوند ورکړے شى.